شباب يتبرعون بقطع غيار سيارة لشاب تعرض لحادث.. جدعنة مش غريبة على المصريين

“أخويا عمل حادثة ومحتاجين نلم له العربية بسرعة فياريت اللي عنده حاجة مش محتاجها من قطع الغيار دي بسعر معقول يعرضها ودا المطلوب” منشور مختصر نشره شاب على إحدى المجموعات الخاصة بالسيارات على فيسبوك، أملاً أن يحصل على عرض جيد من المستخدمين بـ قطع غيار السيارة بأسعار معقولة بدلاً من الشراء من ورشة أو مركز متخصص، في محاولة منه لدعم أخيه. ولكن كانت هناك مفاجأة سارة ومؤثرة جدًا بانتظاره.

المفاجأة التي لم يتوقعها محمود صاحب المنشور هي أن يقرر جميع من علقوا على المنشور أن يتبرعوا بقطع الغيار مجانًا لمساندة الشاب الذي فقد سيارته ودعمه، ويتحول المنشور البسيط إلى ملحمة من الدعم والمساندة شاهدة على جدعنة المصريين. 

فداه مليون عربية

وفي التعليقات كتب أحمد محمود:” صاحبي أنا من اسكندرية وعندي صدر واكصدام قديم أمامي هو ودنه مكسورة بس يمشي الحال خدهم لوجه الله وفداه مليون عربية.. الحمدلله إنه بخير وشوف حابب اشحنهم إزاي وعرفني”.

 

فوانيس وقطع غيارات أخرى لمساندة الشاب

وكتب كمال عمرو:” أنا كان عندي فانوسين فى الورشة هشوفهم لك الصبح لو لسه موجودين حلال عليك من غير حاجة”، وأسرع أحمد عبد المنعم للمساعدة أيضاً وكتب :” عندي ريداتير محتاج خزنة بس وقربه سليمة بالغطا وهشوف لك الموجود بردو في الإسكندرية العصافرة حلال عليك بدون مقابل”.

وسارع آخر يدعى مصطفى هادى، وكتب :” هى دي قاعدة الدينامو و طلمبة الباور اللى قصدك عليها لو كده هى عندى وأنا مش محتاجها .. بس قولى”، وكتب عمرو مصطفى :” ربنا يعوض عليك..عندي شبكة بس محتاجة بتاع فيبر.. وحلال عليك”، وكتب ميشيل أشرف :” معايا مروحة وقربه”، وكتب محمد مصطفى :” شوف الزيوت اللي محتاجها ودي عندي أنا، حمد لله على سلامة أخوك”.